الشيخ : نعم

السائل : السلام عليكم

الشيخ : وعليكم السلام ورحمة الله

السائل : كيف حالك يا شيخ

الشيخ : الحمد لله بخير

السائل : إن شاء الله بخير

الشيخ : الله يحفظك

السائل : إن شاء الله بتظل بخير يا رب

الشيخ : ولك مثل ذلك

السائل : الله يخليك كيف صحتك إن شاء الله تمام

الشيخ : الله يحفظك الحمد لله

السائل : في إلي سؤال صغير

الشيخ : كبّرو كبّرو ولا يهمك

السائل : الله يحييك يا شيخ

الشيخ : الله يحفظك

السائل : بتعامل أنا مع البنك الإسلامي

الشيخ : الله يحفظك

السائل : الله يخليك , بس ما بأخذ يعني لا أرباح ولا بتعامل مثلا إنهم يشتروا لي بضاعة ولا اشتري من طريقهم

الشيخ : لا إنت ما بتربح لكن بتربّح

السائل : بربّح

الشيخ : بتربحهم

السائل : كويس , إللي بحبو أنا بطريقة ال , يعني ببيع أنا بشكات طويلة الأمد

الشيخ : أف

السائل : ثلاثة وأربعة وخمس أشهر يعني , بحط هاي الشيكات في البنك , همّا ما بستفيدوا منها

الشيخ : كيف ما بستفيدوا منها

السائل : ما بستفيدوا منها , لأن صرفها ما هو بالأيام هاي

الشيخ : طيب إنت ما بتحط مالك في البنك

السائل : مالي بحطوا بالبنك

الشيخ : أي هادا هو بيكفيك وزر بقا الآن أنت , ولو أنك ما بتاخد ربح لأنو أنا لفتت نظرك بس أنت ما كنت معي فيما يبدو

السائل : كنت معك لما قلتلّي إنت بتربّحهم

الشيخ : أي طيب ليش ما انتبهت إنو هذا التربيح منك لهم لا يجوز

السائل : آه يعني هم بشتغلوا بالمال إللي أنا بحطّو

الشيخ : أيوه بارك الله فيك

السائل : وإياك إن شاء الله

الشيخ : ولذلك ما بجوز اسحب رأس المال كله أو تضعه في صندوق أمانة ,هوني بقا إذا ربحوا منك أجرة صندوق الأمانة بكون هادا ربح شرعي , أما إنت تحط المال وهنِّ يشتغلوا فيه لأ إنت بكون نفّعتهم وبكون لا سمح الله حققت الشطر الأول من الحديث ألا وهو قوله عليه السلام لعن الله آكل الربا عفوا بكون حققت الشطر الثاني من الحديث وهو قوله عليه السلام لعن الله آكل الربا وموكله فأنت ما بتأكل الربا لكنك تؤكِل الربا , فلا يجوز

السائل : طب يا شيخ وين نحطهم المصاري

الشيخ : هه خليني أنا عندك صندوق أمين لأقلك وين بتحط المصاري هههههه

السائل : شيخ إلي سؤال تاني

الشيخ : لأ بكرة إن شاء الله والسلام عليكم

السائل : وعليكم السلام والرحمة